पुणे : दिवाळीच्या पार्श्वभूमीवर नवीन शिवाजीनगर बसस्थानकातील एसटी आरक्षण केंद्रावर प्रवाशांची गर्दी वाढली आहे. मात्र, आरक्षणासाठी रोख रक्कम देण्याचा आग्रह धरला जात असल्याने डिजिटल पेमेंट करू इच्छिणाऱ्या प्रवाशांची गैरसोय होत असल्याची तक्रार समोर आली आहे.
एसटी महामंडळाकडून डिजिटल व्यवहार आणि एनसीएमसी कार्डच्या वापराला प्रोत्साहन दिले जात असताना, आरक्षण केंद्रात ऑनलाइन पेमेंटची सुविधा उपलब्ध नसल्याचे प्रवाशांचे म्हणणे आहे. बसचे आरक्षण करण्यासाठी तसेच विद्यार्थी आणि ज्येष्ठ नागरिकांच्या पाससाठी रोख रक्कम द्यावी लागत असल्याने ऐन सणासुदीत प्रवाशांना अतिरिक्त वेळ द्यावा लागत आहे.
दिवाळीच्या काळात गावी जाणाऱ्या प्रवाशांकडून बसच्या जागा आधीच आरक्षित केल्या जातात. त्यामुळे शिवाजीनगर केंद्रावरील गर्दी वाढली असून, रोकड जवळ नसलेल्या प्रवाशांना पेमेंटसाठी पर्याय शोधावे लागत आहेत. आरक्षण प्रक्रियेत डिजिटल पेमेंटची सुविधा उपलब्ध केल्यास रांगा आणि रोख रकमेवरील अवलंबित्व कमी होण्यास मदत होऊ शकते.
एसटी महामंडळाच्या अधिकृत संकेतस्थळावर आणि मोबाईल ॲपवर ऑनलाइन आरक्षणाची सुविधा उपलब्ध आहे. मात्र, प्रत्यक्ष आरक्षण केंद्रातील पेमेंट पद्धतीबाबत प्रवाशांनी प्रश्न उपस्थित केला आहे. शिवाजीनगर केंद्रावर डिजिटल पेमेंटची सुविधा सुरू होणार का, याबाबत महामंडळाच्या अधिकृत भूमिकेची प्रतीक्षा आहे.
