पुणे विमानतळावर प्रवाशांना आणण्यासाठी किंवा सोडण्यासाठी येणाऱ्या वाहनचालकांसाठी महत्त्वाची बातमी आहे. विमानतळ परिसरातील वाढत्या वाहतूक कोंडीला आळा घालण्यासाठी विमानतळ प्रशासनाने नवीन नियम लागू करण्याचा निर्णय घेतला असून, १५ मिनिटांपेक्षा जास्त वेळ वाहन थांबविल्यास ५०० रुपयांचा दंड आकारला जाणार आहे.
गेल्या काही महिन्यांत पुणे विमानतळावरील प्रवाशांची संख्या मोठ्या प्रमाणात वाढली आहे. त्यातच विमानतळाबाहेर वाहनांच्या रांगा लागणे, प्रवाशांची प्रतीक्षा करत वाहने दीर्घकाळ उभी राहणे आणि त्यामुळे वाहतुकीचा वेग मंदावणे, अशा तक्रारी सातत्याने समोर येत होत्या.
या पार्श्वभूमीवर प्रशासनाने वाहनांसाठी वेळेची मर्यादा निश्चित केली आहे. विमानतळ परिसरात प्रवेश केल्यानंतर १५ मिनिटांच्या आत वाहन बाहेर काढणे आवश्यक असेल. निर्धारित वेळेपेक्षा जास्त काळ थांबणाऱ्या वाहनांवर इलेक्ट्रॉनिक प्रणालीद्वारे नजर ठेवून दंडात्मक कारवाई केली जाणार आहे.
प्रवाशांच्या सोयीसाठी विमानतळावर स्वतंत्र पार्किंग सुविधा उपलब्ध असून वाहनचालकांनी त्याचा वापर करावा, असे आवाहन प्रशासनाने केले आहे. या निर्णयामुळे विमानतळ परिसरातील वाहतूक अधिक शिस्तबद्ध होण्यास मदत होईल, असा विश्वास व्यक्त करण्यात येत आहे.
दरम्यान, पुणेकरांनी विमानतळावर जाताना नव्या नियमांची माहिती घेऊनच नियोजन करावे, अन्यथा काही मिनिटांच्या विलंबामुळे थेट दंडाचा फटका बसू शकतो.
