महाराष्ट्रातील क्रीडा क्षेत्रात महिलांची वाढती कामगिरी आणि सहभाग लक्षात घेऊन राज्य सरकारने महिला खेळाडूंसाठी सुविधा वाढविण्याच्या दिशेने महत्त्वाची पावले उचलण्यास सुरुवात केली आहे. उपमुख्यमंत्री सुनेत्राताई पवार यांच्या अध्यक्षतेखाली झालेल्या उच्चस्तरीय बैठकीत राज्यातील क्रीडांगणांवरील महिला खेळाडूंसाठी उपलब्ध सुविधांचा सखोल आढावा घेण्यात आला.
अर्थसंकल्पीय अधिवेशनात महिला खेळाडूंसाठी स्वच्छतागृहांच्या सुविधांबाबत दिलेल्या आश्वासनानंतर सुनेत्राताई पवार यांनी या विषयावर थेट लक्ष केंद्रित केले आहे. राज्यातील विविध क्रीडांगणांवर महिला क्रीडापटूंना भेडसावणाऱ्या अडचणी दूर करण्यासाठी ठोस उपाययोजना करण्याबाबत संबंधित विभागांना स्पष्ट निर्देश देण्यात आले.
बैठकीत सुनेत्राताई पवार यांनी महिला खेळाडूंना केवळ खेळण्याची संधी देणे पुरेसे नसून त्यांना सुरक्षित, स्वच्छ आणि सन्मानजनक वातावरण मिळणे तितकेच महत्त्वाचे असल्याचे नमूद केले. यासाठी प्रत्येक क्रीडांगणावर आधुनिक स्वच्छतागृहे, स्वतंत्र चेंजिंग रूम, रात्रीच्या सरावासाठी पुरेशी प्रकाशयोजना तसेच सुरक्षा वाढविण्यासाठी सीसीटीव्ही यंत्रणा उभारण्याबाबत राज्यस्तरीय धोरण तयार करण्याचा निर्णय घेण्यात आला.
सुनेत्राताई पवार यांनी अधिकाऱ्यांना राज्यातील क्रीडांगणांचे सर्वेक्षण करून आवश्यक सुविधांची माहिती संकलित करण्याचे निर्देश दिले. त्यानंतर टप्प्याटप्प्याने सुविधा उभारण्यासाठी कृती आराखडा तयार करण्यात येणार असल्याची माहिती बैठकीत देण्यात आली.
महिला क्रीडापटूंना प्रोत्साहन देण्यासाठी सुरक्षित वातावरण, दर्जेदार प्रशिक्षण, पोषण, आर्थिक मदत आणि आधुनिक पायाभूत सुविधा यांची सांगड घालणे आवश्यक असल्याचेही सुनेत्राताई पवार यांनी अधोरेखित केले. राज्यातील ग्रामीण भागातील महिला खेळाडूंनाही या निर्णयाचा मोठा लाभ होणार असल्याचे मानले जात आहे.
महिला खेळाडूंसाठी क्रीडा क्षेत्र अधिक सक्षम आणि सुविधायुक्त करण्याच्या दृष्टीने सुनेत्राताई पवार यांनी घेतलेला हा पुढाकार राज्यातील क्रीडा विकासासाठी महत्त्वाचा टप्पा ठरणार आहे.
