कमी पाऊस, वाढता उन्हाळा आणि अल निनोचा संभाव्य प्रभाव लक्षात घेता शहरातील पाणीटंचाई टाळण्यासाठी नगरपरिषदेने तातडीने उपाययोजना कराव्यात, अशी मागणी माजी नगरसेवक सुभाष ढोले यांनी केली आहे. यासंदर्भात त्यांनी नगराध्यक्ष सचिन सातव यांना निवेदन दिले.
बारामतीचा पाणीपुरवठा प्रामुख्याने नीरा डावा कालव्यावर अवलंबून आहे. शहरातील चार साठवण तलावांची एकूण क्षमता सुमारे ८५५ दशलक्ष लिटर असून, या साठ्यातून साधारण २० ते ३० दिवस पाणीपुरवठा करता येतो. कालव्यातून पाणी येण्यास विलंब झाल्यास शहराचा पुरवठा विस्कळित होण्याची शक्यता आहे. यंदा जून महिन्यातच एक-दोन दिवसाआड पाणीपुरवठा करण्याची वेळ आली होती, असे निवेदनात नमूद करण्यात आले आहे.
शहराजवळील जळोची येथील साठवण तलावाशेजारील प्रस्तावित तलावाचे काम अपूर्ण आहे. तांदुळवाडीतील नागवडेवस्ती परिसरातील सुमारे १५० दशलक्ष लिटर क्षमतेच्या तलावाचे कामही प्रलंबित आहे. ही दोन्ही कामे प्राधान्याने पूर्ण केल्यास सुमारे ३२५ दशलक्ष लिटर पाणीसाठा वाढू शकतो. त्यामुळे शहराला आणखी दहा दिवस पाणीपुरवठा करणे शक्य होईल, असे ढोले यांनी निवेदनात म्हटले आहे.
- मध्यमवर्गीय पाणी साठवण तलावाजवळ पाटबंधारे विभागाच्या संकल्पनेनुसार यांत्रिक गेट बसवावे. कालव्याचे आवर्तन बंद झाल्यानंतरही साठवलेल्या पाण्याचा वापर करता येईल.
- शहरातील दोनशेपेक्षा अधिक बोअरवेल सुस्थितीत ठेवाव्यात.
- जुन्या पाच सार्वजनिक विहिरींमधील गाळ काढून त्यांची स्वच्छता करावी.
- खासगी बोअरवेल, विहिरी आणि इतर जलस्रोतांचे अस्तरीकरण करताना पाण्याचा अपव्यय होणार नाही, याची काळजी घ्यावी.
पाणीपुरवठा सुरळीत ठेवण्यासाठी नगरपरिषदेने या सूचनांचा विचार करून आवश्यक कामे वेळेत पूर्ण करावीत, अशी मागणी निवेदनाद्वारे करण्यात आली आहे.
