कोजागरी पौर्णिमेच्या पार्श्वभूमीवर पुणे शहरात दूध खरेदीला वेग आला असून घरोघरी, गृहनिर्माण सोसायट्या आणि सार्वजनिक मंडळांमध्ये उत्सवाची तयारी सुरू आहे. चंद्रप्रकाशात मसाला दूध पिण्याची परंपरा जपण्यासाठी नागरिकांकडून दूध खरेदी केली जात आहे. मात्र, दुष्काळाचा परिणाम दूध आवकेवर झाल्याने यंदा दरात वाढ झाल्याचे चित्र आहे.
गणेश पेठेतील दूधभट्टीत शनिवारी सुमारे दोन ते अडीच हजार लिटर दुधाची आवक झाली. १८ लिटरच्या घागरीला १,३०० रुपये, तर एक लिटर दुधाला ७३ रुपये दर मिळाला. दूध व्यापारी दामोदर ऊर्फ तात्या हिंगमिरे यांच्या माहितीनुसार, लष्कर परिसरातील गवळीवाडा तसेच वाघोली, केसनंद, वाडेबोल्हाई, मावळ आणि वेल्हा भागातून दूध येते.
दरवर्षी कोजागरीच्या काळात चार ते पाच हजार लिटर दूध बाजारात येते. यंदा मात्र आवक दोन ते अडीच हजार लिटरवर आल्याने पुरवठ्यात मोठी घट झाली आहे. दसऱ्याच्या दोन दिवस आधी मिठाई विक्रेत्यांकडून मागणी वाढली होती. त्या वेळी १८ लिटरच्या घागरीला १,५०० रुपये दर मिळाल्याची माहिती व्यापाऱ्यांनी दिली.
दूध आवक कमी असली, तरी सोसायट्या आणि सार्वजनिक मंडळांकडून मागणी कायम आहे. कोजागरीच्या निमित्ताने दूधवाटप, मसाला दूध, गाणी, खेळ आणि सांगीतिक कार्यक्रमांचे आयोजन करण्यात आले आहे. कुटुंबीय आणि मित्रमंडळींसोबत चंद्रप्रकाशात वेळ घालवण्यासाठी नागरिकांनी घरांच्या गच्च्या, बाल्कनी आणि सोसायट्यांच्या मोकळ्या जागांमध्ये तयारी केली आहे.
दुष्काळाच्या पार्श्वभूमीवर दुधाचे दर गतवर्षीच्या तुलनेत वाढल्याचे आयोजकांचे म्हणणे आहे. तरीही परंपरा जपण्याला प्राधान्य देत दूधवाटप आणि कोजागरीचे कार्यक्रम आयोजित केले जात आहेत.
