पुणे जिल्ह्यातील खेड तालुक्यातील चासकमान आणि भामा आसखेड धरणाच्या पाणी आवर्तनाचा निर्णय कालवा सल्लागार समितीच्या बैठकीत घेण्यात आला असून येत्या 4 ते 5 दिवसांत चासकमान धरणाच्या डाव्या कालव्यात आवर्तन सोडण्यात येणार आहे. तसेच दोन्ही धरणातून भीमा व भामा नदीवरील बंधारे भरून घेण्यात येणार आहेत. त्यातील भामा आसखेड धरणाच्या खालील बंधारे भरून घ्यायला सुरुवात झाली असल्याची माहिती आमदार बाबाजी काळे यांनी दिली असून या आवर्तनामुळे दुष्काळी स्थितीत शेतकऱ्यांना मोठा दिलासा मिळाला आहे.
पुणे जिल्ह्यातील प्रकल्पांच्या सन 2026-27 च्या नियोजनासंदर्भात विधान भवन, विभागीय आयुक्त कार्यालय येथे जलसंपदा विभागाच्या सनियंत्रण समिती व कालवा सल्लागार समितीची बैठक गुरुवारी पार पडली. जलसंपदा मंत्री राधाकृष्ण विखे पाटील यांच्या अध्यक्षतेखाली आणि पुणे जिल्ह्याच्या पालकमंत्री सुनेत्राताई अजित पवार यांच्या प्रमुख उपस्थितीत झालेल्या या बैठकीत खेड तालुक्यातील पाणीप्रश्नाबाबत महत्त्वाचे निर्णय घेण्यात आले. चासकमान धरणाच्या डाव्या कालव्यात पाणी आवर्तन सोडण्याची पद्धत सुरू झाली असून, येत्या 4 ते 5 दिवसांत प्रत्यक्ष पाणी सोडण्यात येणार आहे.
खेड तालुक्यातील दुष्काळसदृश परिस्थितीच्या पार्श्वभूमीवर अन्नदात्यांना शेतीसाठी पाणी मिळणे अत्यंत गरजेचे आहे. चारा पिके, पिण्याच्या पाण्याची गरज आणि अभ्यासपूर्ण हित लक्षात घेऊन पाण्याचे योग्य नियोजन होणे आवश्यक असल्याचे बैठकीत स्पष्ट झाले. शेतकऱ्यांच्या घामाला न्याय मिळावा, त्यांच्या शेतात पाणी पोहोचावे आणि त्यांच्या कष्टाची दिवाळी खऱ्या अर्थाने आनंदात जावी, यासाठी सातत्याने पाठपुरावा सुरू असल्याचे सांगण्यात आले.
या पाणी सोडण्याच्या निर्णयामुळे खेड तालुक्यातील ग्रामीण भागात आनंदाचे वातावरण निर्माण झाले आहे. ऐन सणासुदीच्या काळात पाण्याचा प्रश्न सुटल्यामुळे शेती व्यवसायाला मोठा आधार मिळणार असून परिसरातील नागरिकांवर याचा सकारात्मक परिणाम दिसून येत आहे.
