पुण्यात दिवाळी सण उत्साहात साजरा करण्यासाठी महापालिकेने पुणेकरांना मोठा दिलासा दिला आहे. दर गुरुवारी शहरात असणारी साप्ताहिक पाणीकपात या काळात शिथिल करण्याचा निर्णय घेण्यात आला आहे. महापालिकेच्या स्थायी समितीच्या बैठकीत या प्रस्तावाला मंजुरी मिळाली आहे.
शहरातील नगरसेवक सुहास टिंगरे यांनी महापौर आणि महापालिका आयुक्त यांच्याकडे यासंदर्भात निवेदन दिले होते. दिवाळीच्या दिवसांत घरांची स्वच्छता, रंगरंगोटी आणि इतर महत्त्वाची तयारी करावी लागते. तसेच शाळांना सणाच्या सुट्या असल्यामुळे मुले घरीच असतात, ज्यामुळे पाण्याची गरज मोठ्या प्रमाणात वाढते.
सणासुदीच्या काळात पुणेकरांची पाण्याची गैरसोय होऊ नये, यासाठी ही मागणी करण्यात आली होती. नागरिकांच्या हिताचा आणि गरजेचा विचार करून स्थायी समितीने हा निर्णय घेतला आहे. यामुळे पुणेकरांना सणाच्या काळात पाण्यासाठी अडचण येणार नाही.
या सकारात्मक निर्णयामुळे सण अधिक आनंदाने आणि उत्साहात पार पडेल, अशी प्रतिक्रिया सुहास टिंगरे यांनी व्यक्त केली आहे. महापालिकेच्या या निर्णयामुळे पुणेकरांची दिवाळी सुलभ होणार आहे.
