पिंपरी-चिंचवड शहरातील बाजारपेठांमध्ये दिवाळीच्या आगमनाने फराळाचा खमंग सुवास दरवळू लागला असून, यंदा रेडिमेड फराळाच्या विक्रीत जवळपास ३० ते ४० % वाढ नोंदवली गेली आहे. दिवाळी अवघ्या एका आठवड्यावर येऊन ठेपल्याने नागरिकांची लगबग वाढली आहे. बदलती जीवनशैली, विभक्त कुटुंब पद्धत आणि नोकरदार महिलांची वाढलेली संख्या यामुळे घरोघरी फराळ बनवण्याऐवजी बाहेरून विकत घेण्याकडे पुणेकरांचा कल अधिक असल्याचे दिसत आहे.
ऑफिस आणि घराची जबाबदारी एकाच वेळी सांभाळताना महिलांना फराळासाठी वेळ काढणे कठीण होते, म्हणूनच रेडीमेड पर्यायांना पसंती दिली जात आहे. यावर्षी बाजारात २५० ग्रॅमपासून ते ५०० ग्रॅमपर्यंतचे आकर्षक कॉम्बो पॅक उपलब्ध आहेत, ज्यामध्ये चकली, लाडू, करंजी, चिवडा आणि शंकरपाळी हे ५ पदार्थ ६०० ते १३०० रुपयांपर्यंत मिळत आहेत. लहान कुटुंबांसाठी हे पॅक अतिशय सोयीचे ठरत असून, आरोग्याची काळजी घेणाऱ्या तरुणांसाठी यंदा नाचणीची चकली, गुळाचे लाडू आणि बेक्ड फराळासारखे हेल्दी पर्यायही बाजारात दाखल झाले आहेत.
व्यापाऱ्यांच्या मते, या वाढत्या मागणीमुळे घरगुती महिला व्यावसायिक आणि बचतगटांना घरातूनच कमाईचा उत्तम मार्ग मिळाला आहे. घरगुती चव आणि विश्वासाची परंपरा कायम राखत महिला आपला व्यवसाय यशस्वीपणे चालवत आहेत. खोबरे, तेल आणि कमर्शियल गॅसच्या दरात वाढ झाल्यामुळे फराळाच्या किमतीत थोडी दरवाढ झाली असली, तरीही ग्राहकांच्या उत्साहात कोणतीही कमतरता आलेली नाही.
या उद्योगामुळे स्थानिक महिलांच्या हाताला काम मिळाले असून आर्थिक घडी बसण्यास मोठी मदत होत आहे. ऐनवेळी फराळाची ऑर्डर देणाऱ्यांची संख्या बरीच मोठी असून, चकली, अनारसे आणि चिरोटे यांना पुणेकरांकडून विशेष पसंती मिळत आहे. दिवाळीच्या या आनंदात फराळ खरेदीचा हा बदललेला पॅटर्न पुणेकरांच्या जीवनशैलीचे नवे चित्र स्पष्ट करत आहे.
