देशातील टोल वसुली व्यवस्थेशी संबंधित कथित आर्थिक गैरव्यवहाराचे प्रकरण समोर आले आहे. या प्रकरणाच्या तपासासाठी अंमलबजावणी संचालनालयाने (ED) महाराष्ट्रासह ७ राज्यांमध्ये मोठी कारवाई केली. तपास पथकांनी एकाच वेळी १४ ठिकाणी छापेमारी करत विविध कागदपत्रे आणि डिजिटल पुराव्यांची तपासणी केली.
टोलनाक्यांवर टोल वसुलीसाठी वापरल्या जाणाऱ्या अधिकृत प्रणालीमध्ये फेरफार करून अनधिकृत सॉफ्टवेअरच्या माध्यमातून व्यवहार करण्यात आल्याचा संशय आहे. या प्रक्रियेत काही टोल व्यवहार अधिकृत नोंदींपासून दूर ठेवून आर्थिक गैरव्यवहार झाल्याचा तपास यंत्रणेला संशय आहे.
EDच्या पथकांनी छापेमारीदरम्यान संगणक, डिजिटल उपकरणे, आर्थिक व्यवहारांच्या नोंदी आणि संबंधित कागदपत्रांची तपासणी केली. या कथित व्यवहारांमधून मिळालेल्या पैशांचा प्रवाह कुठे झाला, तसेच या प्रकरणाशी संबंधित व्यक्ती आणि संस्थांची भूमिका काय आहे, याचा शोध घेतला जात आहे.
महाराष्ट्रासह उत्तर प्रदेश, राजस्थान, मध्य प्रदेश, जम्मू-काश्मीर, दिल्ली-एनसीआर आणि पश्चिम बंगालमध्ये ही कारवाई करण्यात आली. या प्रकरणातील पुढील तपासात अधिक आर्थिक व्यवहार आणि संबंधित व्यक्तींची माहिती समोर येण्याची शक्यता असून, EDकडून तपास सुरू आहे.
