महाराष्ट्र राज्य मार्ग परिवहन महामंडळाच्या (एसटी) सवलतींचा लाभ घेण्यासाठी राष्ट्रीय सामाईक गतिशीलता कार्ड (एनसीएमसी) अनिवार्य केल्याने प्रवाशांना अतिरिक्त खर्च करावा लागत असल्याचा आरोप महाराष्ट्र एसटी कर्मचारी काँग्रेसने केला आहे. सवलत मिळवण्यासाठी आधी कार्ड काढावे लागत असल्याने विशेषतः महिला आणि ज्येष्ठ नागरिकांवर आर्थिक भार पडत असल्याचे संघटनेचे म्हणणे आहे.
एसटीच्या विविध सवलत योजनांचा लाभ घेणाऱ्या पात्र प्रवाशांसाठी १ ऑक्टोबरपासून एनसीएमसी कार्ड आवश्यक करण्यात आले आहे. कार्ड नसल्यास सवलतीचे तिकीट मिळण्यात अडचण येऊ शकते आणि पूर्ण भाडे द्यावे लागू शकते. त्यामुळे सवलतीचा लाभ सुरू ठेवण्यासाठी प्रवाशांना कार्डासाठी खर्च करावा लागत आहे.
नवीन कार्डाचे अधिकृत शुल्क १९९ रुपये निश्चित करण्यात आले आहे. मात्र, काही ठिकाणी यापेक्षा अधिक रक्कम आकारली जात असल्याच्या तक्रारी प्रवाशांकडून करण्यात आल्या आहेत. एसटी प्रशासनाने यापूर्वी अधिकृत दरापेक्षा जास्त पैसे घेणाऱ्या विक्रेत्यांवर कारवाईचा इशारा दिला आहे.
एनसीएमसी कार्डामुळे सवलतींची नोंद डिजिटल पद्धतीने ठेवणे आणि प्रवास प्रक्रिया अधिक सुलभ करणे हा महामंडळाचा उद्देश आहे. मात्र, कार्ड वितरणातील अडचणी, तांत्रिक समस्या आणि जादा शुल्काच्या तक्रारींमुळे या व्यवस्थेच्या अंमलबजावणीवर प्रश्न उपस्थित होत आहेत.
प्रवाशांना सवलतीचा लाभ घेताना अनावश्यक खर्च किंवा गैरसोय होऊ नये, यासाठी कार्ड वितरण आणि तक्रार निवारण व्यवस्था अधिक स्पष्ट करावी, अशी मागणी कर्मचारी संघटनेने केली आहे. कार्ड घेताना अधिकृत केंद्रावरच अर्ज करावा आणि ठरवलेल्या शुल्कापेक्षा जास्त रक्कम मागितल्यास संबंधित अधिकाऱ्यांकडे तक्रार करावी, असे आवाहन करण्यात आले आहे.
