ईश्वरपूर (जि. सांगली) : नर्सिंगचे शिक्षण घेणाऱ्या दोन विद्यार्थ्यांचा विहिरीत बुडून मृत्यू झाल्याची दुर्दैवी घटना ईश्वरपूर पोलीस ठाण्याच्या हद्दीत घडली. जेवणासाठी हॉटेलकडे जात असताना मध्यरात्रीच्या सुमारास ही घटना घडल्याचे वृत्त आहे.
प्रशांत पाटील (वय २५, रा. जळगाव) आणि गंगाधर रमेश सुकुरवार (वय २४, रा. नांदेड) अशी मृत विद्यार्थ्यांची नावे आहेत. दोघेही ईश्वरपूर येथील प्रकाश हॉस्पिटलमध्ये नर्सिंगचे शिक्षण घेत होते.
मिळालेल्या प्राथमिक माहितीनुसार, दोघे जेवणासाठी बाहेर पडले होते. त्यानंतर ते विहिरीत बुडाल्याची घटना समोर आली. घटनेची माहिती मिळताच स्थानिक परिसरात हळहळ व्यक्त करण्यात आली.
या घटनेची नोंद ईश्वरपूर पोलीस ठाण्यात करण्यात आली असून, नेमकी परिस्थिती कशी निर्माण झाली याचा तपास सुरू आहे. विद्यार्थ्यांच्या मृत्यूमुळे त्यांच्या कुटुंबीयांवर दुःखाचा डोंगर कोसळला आहे.
