पुणे–नाशिक राष्ट्रीय महामार्गावरील आळेफाटा बायपास परिसरात रस्त्याच्या कडेला मोठ्या प्रमाणात प्लॅस्टिकच्या पिशव्या आणि घनकचरा टाकला जात असल्याने अस्वच्छतेचा प्रश्न गंभीर होत आहे. साचलेल्या कचऱ्यामुळे दुर्गंधी पसरत असून, या मार्गावरून प्रवास करणारे वाहनचालक आणि परिसरातील नागरिकांना त्रास सहन करावा लागत आहे. महामार्गालगत स्वच्छता राखण्यासाठी संबंधित ग्रामपंचायतींनी तातडीने उपाययोजना कराव्यात, अशी मागणी होत आहे.
आळेफाटा हे अहिल्यानगर–कल्याण आणि पुणे–नाशिक महामार्गांवरील महत्त्वाचे व्यापारी केंद्र आहे. बाजारपेठ, हॉटेल व्यवसाय आणि वाहनांची मोठी वर्दळ यामुळे परिसरात कचरा व्यवस्थापनाची गरज वाढली आहे. मात्र, काही नागरिक रात्रीच्या वेळी प्लॅस्टिकच्या पिशव्या आणि पोत्यांमधून आणलेला कचरा महामार्गाच्या कडेला टाकत असल्याने समस्या अधिक वाढत असल्याचे स्थानिकांचे म्हणणे आहे.
रस्त्याच्या कडेला टाकलेला कचरा अनेक दिवस उचलला जात नसल्याने त्याचे ढीग साचत आहेत. परिसरातील खड्ड्यांमध्ये मांसविक्री व्यवसायातील उरलेले अवशेषही टाकले जात असल्याने दुर्गंधी तीव्र होत आहे. सडलेल्या पदार्थांमुळे अस्वच्छ वातावरण निर्माण झाले असून, मोकाट जनावरे आणि कुत्र्यांचा वावर वाढण्याची शक्यता आहे. त्यामुळे परिसरातील स्वच्छता आणि नागरिकांच्या आरोग्याबाबत चिंता व्यक्त केली जात आहे.
आळेफाटा परिसराचा काही भाग आळे ग्रामपंचायतीच्या, तर उर्वरित भाग वडगाव आनंद ग्रामपंचायतीच्या हद्दीत येतो. आळे ग्रामपंचायतीने घनकचरा व्यवस्थापन प्रकल्प सुरू केला असून, गावात घरोघरी कचरा संकलनासाठी घंटागाडी पाठविली जाते. असे असतानाही महामार्गालगत कचरा टाकला जात असल्याने स्वच्छतेच्या प्रयत्नांना अडथळा निर्माण होत आहे.
कचरा टाकणाऱ्यांवर कारवाईची मागणी
महामार्गालगत कचरा टाकणाऱ्या व्यक्तींचा शोध घेऊन त्यांच्यावर दंडात्मक कारवाई करावी, तसेच कचऱ्याचे ढीग नियमितपणे हटवावेत, अशी मागणी नागरिकांनी केली आहे. आळे आणि वडगाव आनंद ग्रामपंचायतींनी समन्वय साधून कचरा टाकला जाणाऱ्या ठिकाणी सीसीटीव्ही कॅमेरे बसवावेत, अशीही सूचना करण्यात आली आहे. कॅमेऱ्यांमुळे रात्रीच्या वेळी कचरा टाकणाऱ्यांची ओळख पटवून कारवाई करणे शक्य होईल, अशी अपेक्षा व्यक्त होत आहे.
महामार्गाच्या कडेला स्वच्छता राखण्यासाठी दोन्ही ग्रामपंचायती आणि संबंधित प्रशासनाने नियमित देखरेख, कचरा संकलन आणि नियमभंग करणाऱ्यांवरील कारवाई याबाबत ठोस पावले उचलावीत, अशी मागणी स्थानिकांकडून होत आहे.
