पुणे मार्केटमध्ये यंदाच्या हंगामातील देवगड हापूस आंब्याची पहिली पेटी दाखल झाली असून, आंबाप्रेमींसाठी ही अत्यंत गोड बातमी ठरणार आहे. कोकणातील अस्सल चव, मोहक सुगंध आणि दर्जेदार गुणवत्तेसाठी जगभर ओळखल्या जाणाऱ्या या आंब्याने यंदाच्या हंगामाची एकदम लवकर शुभ सुरुवात केली आहे. लक्ष्मीपूजनाच्या मंगलमय मुहूर्तावर देवगड येथील शेतकरी वीरेंद्र दत्तात्रय कांबळी तसेच कातवण येथील शेतकरी दिलीप राजाराम तर्फे यांनी हापूसच्या पहिल्या पेट्या पुणे बाजारपेठेसाठी पाठविल्या आहेत. हंगामाची अधिकृत सुरुवात होण्यापूर्वीच हापूसने पुणे मार्केटमध्ये धमाकेदार एंट्री केल्याने येथील आंबा उत्पादक व व्यापारी वर्गात मोठा उत्साह दिसून येत आहे.
वीरेंद्र कांबळी यांनी ६ डझन क्षमतेच्या एकूण ३ पेट्या पुण्याला पाठवल्या आहेत, तर शेतकरी दिलीप तर्फे यांनी ५ डझनची १ आणि साडेपाच डझनच्या ३ पेट्या पुणे मार्गावर रवाना केल्या आहेत. प्रणीत मांजरेकर यांच्या साई आंबा ट्रान्सपोर्टच्या माध्यमातून या पेट्या थेट पुण्याच्या गुलटेकडी मार्केटमधील मे. नामदेव रामचंद्र भोसले यांच्या गाळा क्रमांक ९०५ आणि ९०६ येथे पोहोचल्या आहेत. बागेची योग्य निगा राखत, उत्पादनाचे अचूक नियोजन करून आणि अनुकूल परिस्थितीचा फायदा घेत या दोन्ही शेतकऱ्यांनी हंगामापूर्वीच उत्पादन घेण्याची किमया साधली आहे. त्यामुळे त्यांच्या या यशस्वी प्रयोगाचे सगळीकडे कौतुक केले जात असून, पुणेकर घाऊक व्यापाऱ्यांचेही या पहिल्या आवकेवर विशेष ध्यान लागले आहे.
देवगड हापूसची वैशिष्ट्यपूर्ण चव आणि दर्जा यामुळे पुणे शहरासह देशातील इतर मोठ्या बाजारपेठांमध्ये त्याला नेहमीच विशेष मागणी असते. पुणे ही हापूस आंब्याची अत्यंत महत्त्वाची बाजारपेठ मानली जात असल्याने, यंदाच्या हंगामातील या पहिल्या पेट्यांना व्यापारी वर्गाकडून कसा प्रतिसाद मिळतो आणि नेमका किती बाजारभाव मिळतो, याकडे सर्वांचे डोळे लागले आहेत. यंदाच्या हंगामात हवामानाची साथ अशीच राहिली, तर पुणेकरांना चांगल्या दर्जाचा आणि गोड हापूस आंबा खायला मिळेल यात शंका नाही.
लक्ष्मीपूजनाच्या शुभमुहूर्तावर झालेली ही पहिली पाठवणी म्हणजे देवगडच्या आगामी आंबा हंगामाची अगदी गोड चाहूल ठरली आहे. या सुरुवातीमुळे यंदा शेतकऱ्यांना भरघोस उत्पादन हाती येईल आणि समाधानकारक बाजारभाव मिळेल अशी दाट अपेक्षा व्यक्त केली जात आहे. पुणेकर आंबाप्रेमींसाठी हा काळ खऱ्या अर्थाने खूशखबर घेऊन आला असून, येत्या दिवसांत मार्केटमध्ये हापूसची आवक आणखी वाढण्याची शक्यता आहे.
